I PALUMBEḌḌI

Premiata alla XVI edizione del premio “Rhegium Julii – Nicola Giunta” 2012

 

Ddu’ palumbeḍḍi supr’ê ciaramiti

si inchivunu di bbaci e ddi carizzi

ċċhiú mmeġġhiu ‘i comu ponnu fari i zziti:

u coḍḍu si llisciavunu ch’i pizzi,

 

cu ll’ali si mbrazzavunu ntê scianchi,

a testa si ssricavunu ntô pettu.

Ngattati comu s’erunu senz’anchi,

facivunu hav’un pezzu ḍḍu ggiochettu

 

cu ll’oċċhi bbelli toḍḍiri d’amuri

e u coḍḍu tuttu unċhiatu di piaciri.

«Curú … curú …» pariva nu vapuri

u maggicu rrumuru ‘i ḍḍi suspiri.

 

«Curú … curú …» E antantu zzitti zzitti,

si ravunu da fari i palumbeḍḍi,

mbiḍḍati l’una all’atra ssritti ssritti …

nu rappiceḍḍ’i pinni e ppinniceḍḍi.

 

Finiva aḍḍá u mundu, nta ḍḍi bbaci,

nta ḍḍi carizzi, nta ḍḍi llisciamenti;

an giru an giru nc’era tanta paci

e un fil’i ventu non spasciava nenti.

 

‘I sutta, ntô ggiardinu, a menżureḍḍa

un cani si faciva, ntô ssramenti

chi ssi piġġhiava u suli a jattareḍḍa.

‘I bbotta n’umbra nira, comu nenti,

 

inchíu u celu e u jornu si scurau:

u masculu d’istintu s’a fuíu

e nnu ceḍḍazzu com’a nnu mamau

calau supr’a palumba: nu pizzíu!

 

Non fici ddu’ tri mmetri u masculeḍḍu,

ch’ampena vitti a mara sbinturata

nċhiovata nta ḍḍi ggranfi, supr’ô ceḍḍu

si ittau cu ttutt’a forza, all’impinzata.

 

«Vatindi!» a so’ cumpagna nci ggrirava

‘i sutt’ê ggranfi. «Campa armenu tu!»

U palumbeḍḍu antisa non nci rava,

ch’ormai mi campa non pinzava ċċhiú.

 

C’a furia ‘i nu liuni scatinatu

mullau a palumba u ceḍḍu di rrapina:

nti chiḍḍu si llanzau tuttu ncanïatu

e nta ddu’ bbotti ‘u fici a cciaurrina.

 

Apoi si ndi bbulau, rassandu ‘nterra

i poviri pitinghi r’u dammaggiu,

a ccomu quandu l’ali menti a guerra

e ddassa lutti e mmorti ô so’ passaggiu.

 

Muviva cacchi ffoġġhia ntô ggiardinu

u ventu, u suli si piġġhiava a jatta

e u cani cuntinuava u sonnellinu,

cu ttuttu ch’a jurnata s’era spatta.

 

Ḍḍu jornu i vitti trubbuli e ppizzïati

ḍḍi mari ḍḍá, nċhianandu vers’u Forti;

aívunu nta ll’oċċhi ancora a stati

pirchí l’amuri vinci puru a morti.

 

*   *   *

Share
This entry was posted in Dialetto reggino, Poesia. Bookmark the permalink.

Lascia un commento